EUSKALDUNON EGUNKARIA, 1999/09/14

Mobilizazio ugari antolatu ditu Batera-k euskal presoak Euskal Herriratzeko

Batera plataformaren batzorde iraunkorrean izango dira Lizarrako alderdiak etaELA eta LAB sindikatuak . Abenduaren 31n manifestazioak egingo dira Euskal Herriko herri guztietan, arratsaldeko zortzietan hasita . Dekalogoa plazaratu du batzorde iraunkorrak, eta gaurtik aurrera atxikimenduak lortzeko kanpainari ekingo dio

Felix Iriarte / Gasteiz. - URTEA amaitu bitartean makina bat mobilizazio egingo dira Euskal Herriko herri eta txoko guztietan, presoak Euskal Herriratzeko. Hala erabaki zuen atzo Batera plataformak Gasteizen egin zuen batzarrean, eta mobilizazioen egutegia zehaztu zuen, halaber.

Bihar ekingo zaio hilabete eta erdiko Ğesprintariğ, Xabier Euzkitze plataformako eledunaren hitzak erabilita. Gipuzkoako Foru Aldundiaren aurrean 15 minutuko elkarretaratzea egingo da. Bizkaiak hartuko du lekukoa astebete geroago, eta beste 15 minutuz bilduko dira Diputazioaren aurrean. Azaroko txanda Arabako Foru Aldundian amaituko da, 29an.

Hilero ostiral bat hautatuko du Batera-k Gasteizko Legebiltzarraren aurrean biltzeko. Oraindik azaroko ostirala zehaztu gabe dago. Abenduko egutegia ez dago erabat eratuta: 9an edo 10ean Nafarroan egingo da kontzentrazioa, Gipuzkoan 13an, Araban 27an eta berriro Nafarroan abenduaren 30ean. Hala ere, non egingo diren ez da argitu. Baliteke diputazioen aurrean egitea, edo, bestela, bakoitzak bere udaletxearen aurrean.

Erakundeen aurreko mobilizazioez gain, herrietan ere izango dira. Lehena, datorren ostiralean, azaroaren 19an. Arratsaldeko zortzietan da hitzordua, eta herri bakoitzak erabakiko du non bildu. Abenduaren 3an eta 17an ere kontzentrazioak egingo dira herri guztietan. Mobilizazioen Ğesprintağ Gabon zahar egunean amaituko da, egun horretan manifestazioak egingo baitira Euskal Herriko herri guztietan.

Batera plataformak, gainera, batzorde iraunkorra eta bozeramaileak izendatu zituen, eta bere egiten dituen printzipioak dekalogo baten bildu.

Batera-ko batzorde iraunkorra

Ondoko hauek osatzen dute Batera-ko batzorde iraunkorra:

Euskal presoen eskubideen alde

1. Printzipio humanitarioekin zein gizakien eskubide eta askatasunekin dugun konpromisoa aldarrikatu nahi dugu.

2. Askatasunik gabe dauden pertsonek ere badituzte eskubideak, testuinguru edo interes politikoen araberako negoziaketa edo trukean erabil ez daitezkeen eskubideak. Giza eskubideak osotasunean errespetatu behar dira.

3. Presoek euren gizarte eta familia ingurunetik hurbilen dauden kartzeletan, Eskal Herrikoetan, egon behar dutela aldarrikatzen dugu behin eta berriz.

4. Indarrean dagoen kartzela politikak zentzuna, legedia eta printzipio humanitarioak zapaltzen ditu. Horrez gain, inpunitateari eta giza eskubideen urraketari bide ematen dioten kontrol judizialaren hutsuneak ere sortzen ditu.

5. Kartzela politika agindu humanitarioei zor zaien errespetu ezaren lekuko garbia dugu. Hori, batik bat, baldintzapeko askatasuna lortzeko epeetan sartu diren eta gaixotasun sendaezinak dituzten presoen kasuan gertatzen da. Legedi hori, behin eta berriro, sari, zigor, testuinguru eta interes politikoen arabera ezartzea salatzen dugu. Frantziar estatuan kartzelaturik dauden euskal presoen kasuan, euren zigorra bete orduko burutzen diren entrega polizialen eta espultsioen aurkako jarrera adierazteaz gain, hautatzen duten lurraldean bizitzeko eskubidea exijitzen dugu.

6. Euskal gizarteak adierazi du gatazka politikoa humanizatzearen alde dagoela, eta kartzela politika ezartzerakoan legea errespetatu egin behar dela. Espainia eta Frantziako Gobernuek jarrera horri erakusten dioten mesprezua azpimarratu beharrean gaude (...). Espainia eta Frantziako Gobernuei, euskal gizartearen nahi demokratikoa eta askatasunik gabe dauden pertsonen giza eskubideak errespeta ditzaten eskatzen diegu.

7. Kartzela politika honen aplikazioa are larriagoa da gure herrian bake eta konponbide demokratikoen esperantza egia bihurtzen ari den egunotan. Espainia eta Frantziako Gobernuen kartzela politikak, gizakien duintasunari erasotzeaz gain, samin, haserre, krudeltasun eta mesfidantza besterik ez du sortzen.

8. Gure ustez, zabalduriko prozesuan, euskal presoen inplikazioa elkarrizketaren, negoziaketaren eta letozkeen akordioen elementu pizgarria da.

9. Gatazkaren humanizazioaren eta berradiskidetzearen aldeko konpromiso gogotsua adierazten dugu. Horrek, gatazka politikoak eragin duen bortizkeriaren emaitzak jasan dituzten eta jasaten ari diren guztien samina modu eraginkorrean geureganatzen eta gainditzen lagunduko digu. Gure herriak eskubide osoz lortu nahi duen etorkizun demokratikoarekin konpromiso gogotsua ere adierazi nahi dugu.

10. Helburu bikoitza dugu: batetik, egungo kartzela politika salatu eta euskal presoen eskubideak berma daitezen erdiestea. Bestetik, giza eskubideekiko konpromisoak ahalik eta alor eta pertsona kopururik handien eta anitzena modu gogotsuan bil dezan lortzea.